GIUFA' = Bongionnu, don Babà: C'aviti stamatina, aviti a facci russa comu na paparina...DON BABA' = Chi haiu? sugnu 'ncazzatu forti... propriu ora mi ficiru pigghiari na botta di bili, all'assicurazioni.
GIUFA' = Scummettu pa machina: chi facistu cacchi 'nvistimentu?...
DON BABA' = Ringrazziandu a diu, havi quarant'anni chi non denunziu 'ncitenti. Tantu chi na vota l'assicurazioni mi facia u bonusmalus, No, u fattu è chi ant'ura mi prisintà all'ufficio assicurazzioni pi pagari a rata e u sà chi mi cumminaru?
GIUFA' = No sacciu...chi vi cumminaru?
DON BABA' = Mi prisintaru, senza nuddu preavvisu, na stigghiola cull'aumentu du vinticincu peccentu. A mia chi non fazzu 'ncidenti e chi pagu puntuali prima ancora chi scadi a polizza...e iddi fannu chiddu chi cavulu vonnu, senza mandarimi mancu un cannavazzu di littra pi fammi sapiri chi mi stavunu priparandu..
GIUFA = Ma vui picchì non andavu a parrari a test'ellacqua: ciava a essiri un capu 'nta st'ufficiu...
DON BABA'= E chistu mi fici 'ncazzari chiossài: a picciotta mi dissi di lamintarimi non cu idda ma cu sò diritturi, e quandu iò ci dissi chi vulia parrari propriu cu iddu, u sà chi mi rispundiu?
GIUFA' = Chi vi rispundiu?
DON BABA' = U so' ufficio è supra o primu pianu, ma u diritturi non c'è, è fora paisi...
GIUFA' = Scummettu chi era in missioni. Fossi era a Roma a parrari cu Monti..
Nessun commento:
Posta un commento