GIUFA' HAVI UN PULICI 'NTESTA: SI VOTA O NON SI VOTA?

GIUFA' = Cumpari Babà, iavi na sumana chi vi cercu e non vi trovu...
DON BABA' = Chi c'è Giufà di tantu 'mportanti ?
GIUFA' = Sapiti che i primi i maju si vota, ma a mia mi dissiru chi forsi non si vota. Com'è stu fattu?
DON BABA' = Cu tu misi stu pulici 'ntesta. Chi leggi piccasu i giunnali?
GIUFA' = U sapiti chi non sacciu léggiri. Diciunu chi strogghiunu u comuni. Ma chi è un cani o un viteddu chi si po' strogghiri?
DON BABA' = U comuni è comuni e non si strogghi, si po' strogghiri u cunsigghiu. Ma lassamu stari: puru cinc'anni fa si dicia chi strugghiunu u cunsigghiu comunali e poi non si fici nenti:
GIUFA' = E picchì no strugghieru?
DON BABA' = Tandu si parrò d'un surici chi s'introduciu e finiu a nenti.
GIUFA' = Comu a favula du vicchiareddu c'avia un sanareddu si cattò u latticeddu e poi vinni un suriceddu...
Ma ora chi veni a jatta?  A iatta di biancaneve?
DON BABA' = Giufà, megghiu canciari discussu: Mittemu chi si vota. U sa tu comu a fari?
GIUFA' = Dicitimmillu vui chi sapiti tanti cosi. A cu ci l'ha dari u me votu?
DON BABA' = Caru Giufà, a cu dari u votu non tu pozzu diri, pi tanti motivi: non sugnu candidatu e non haiu nè figghi  o autri parenti e amici da signalari. Ti pozzu diri sulu chi  si po' scegghiri 'nta  lista u cunzigghieri chi ti piaci e scegliri u sindicu chi megghiu ti pari .
GIUFA' = Ah, c'è libbirtà di votu. nenti purcidduzzu, menu mali!!!! Putemu così aviri u sinducu chi ndi pari megghiu.
DON BABA' = Si, e si po' fari nesciri, si non a prima botta, a secunda botta.
GIUFA' = Comu, comu? Chi vuliti diri cu sta secunda botta?
DON BABA' =  S'a prima votazioni nuddu candidatu supira a metà di voti non si 'nchiana e s'ava fari u ballottahggiu:
GIUFA' = U chi? U battagghiu?
DON BABA' = U ballottaggiu: i dui chi pigghiaru i voti chiossai si fannu u spareggiu.
GIUFA'= Ah, fannu a finalissima comu a campiullig. Iò di sti cosi mindintendu.
DON BABA' = Bravu a Giufà, ti meriti un babà.