LA BANDA DEL BUCO OTTURATO

Giufà: Chista è curiusa pi Baccialona!

DonBabà: Chi succidiu?

Giufà: Ci stupparu u catinazzu da scola i Pizzaottu, e i carusi non pòttiru trasiri all’ura giusta.

DonBabà: Parri da scola d’anchianat’o Càrminu?

Giufà: Parru da scola media du marchisi daccòntrisi, chidda undi cumanda u sindicu Speciali.

DonBabà: Tu vo’ diri u presidi Speciali, chiddu chi na vota fici puru u sindicu. E o catinazzu chi ci ficiru?

Giufà: Leggi ccà, nto giunnali d’avoi.

DonBabà: “ Ieri mattina, studenti e professori della scuola media D’Alcontres, hanno avuto la sgradita sorpresa di trovare la serratura dell’ingresso principale sigillata con l’attack."

Giufà: Un attaccu contro a Speciali, ci ficiru!?!

DonBabà: U gionnalista chiama attaccu a codda chi ci misiru ntò puttusu du catinazzu da scola.

Giufà: Ora capisciu: na specie di mastici chi si non stamu attenti ndì fa mpicciari i itita di mani.
E comu ficiru pig ghiàpriri?

DonBabà: Ci misiru nto puttusu cacchi picca d’acqua raggia. E così rinisceru a libirarlu.

Giufà: U puttusu? Menu mali! Menu mali! U puttusu ava essiri sempri libbiru.